Александар Вучковски - сомелиер: Како македонските вина го освојуваат светот? ↓↓↓
Украинскиот претседател Володимир Зеленски, обраќајќи им се на лидерите земјите од Г7 преку видеоконференција, им порача дека можат да бидат „голема група мировници“ со засилување на санкциите и создавање на нов сојуз наречен У-24.
Претходно, Зеленски виртуелно им се обрати и на лидерите на НАТО.
„Можеме да ја направиме вашата група Г7 не само голема седумка, туку одлична група мировници, одлични седум мировници. Што ни треба? Украина е многу специфична во одговорот на ова прашање. Секоја недела мораме да ги засилуваме санкциите против руската агресија додека не заврши и не се врати мирот“, им порача Зеленски на лидерите на земјите од Г7.
Тој додаде: „Следно, треба да создадеме нов систем на безбедносни гаранции за Украина и нашиот регион. Вистински гаранции, ефективни гаранции кои можат да ја запрат секоја агресија во рок од 24 часа. Во рок од 24 часа предложивме здружение, У-24. Нешто што на светот му треба не само за да се спречат војните, туку и да се запрат активните непријателства што веќе започнаа, а исто така да се обезбеди поддршка за оние земји кои страдаат од природни катастрофи или имаат потреба од поддршка за време на пандемии или кои се соочуваат со миграција или кризи со храна“.
Зеленски ги праша лидерите колку итни самити ќе треба да се одржат додека не се решат проблемите создадени од Русија.
„Во последните години Русија успеа да создаде толку многу кризи и толку многу нестабилност што стана главен проблем на светот. Проблем кој само се зголемува и не можеме ни да претпоставиме колку вакви итни самити ќе треба да се одржат пред да се решат проблемите што ги создаде Русија“, рече Зеленски на состанокот на Г7.
Украинскиот претседател ги предупреди земјите од Г7 дека акциите на Русија во Украина доведоа до глобална прехранбена криза.
„Русија ја уништи глобалната безбедносна архитектура и им нанесе силен удар на меѓународните односи. Но, ова е само почеток. Оваа војна може да биде проследена со глобална криза со храна. Колку подолго нема мир на украинската земја, толку помалку храна ќе добива светскиот пазар од Украина и многу земји во Азија, Африка, па дури и Европа може да имаат екстремни проблеми со пристапот до основната храна и цените на храната. Ова дефинитивно ќе резултира со политичка дестабилизација и можеби тоа беше целта на руското раководство. Не знам“, рече Зеленски.
„Но, ние мора да дејствуваме веднаш. Мора веднаш да ги запреме руските војници и да ги извлечеме од Украина. Ни треба итен мир пред светот да се соочи со друго ниво на проблеми. Подобро е да се користат санкции против Русија сега што е можно повеќе за да се запре нејзината воена машинерија, отколку подоцна да се справиме со последиците од глобалната криза со храна“, додаде украинскиот претседател.
Зеленски повика на „целосно ембарго за трговија“ со Русија и да се спречи Русија да го користи системот ГПС.
„Невидените предизвици бараат целосно ембарго за трговија со Русија. Русија мора да биде лишена од можноста дури и да користи ГПС во војната. Важно е овој систем да не им помага на руските ракети и бомби за да ги уништуваат мирните градови“, рече Зеленски.
„Руските банки и главно Централната банка на Русија мора да бидат целосно блокирани од глобалниот финансиски систем. Воените злосторници мора да останат без пари, а нивните замрзнати средства мора да се претворат во репарации“, им рече тој на земјите од Г7.
„Ова е во наш интерес, тоа е во ваш интерес. Тоа е во интерес на сите демократии, бидејќи демократиите мора да бидат способни да се бранат. Животот мора да триумфира над смртта“, рече Зеленски.
Украинскиот претседател повторно ја обвини Русија за распоредување фосфорна муниција, чии одредени употреби се или забранети или ограничени според меѓународното право. CNN не е во можност да ги потврди овие тврдења. Американскиот Стејт департмент, исто така, изјави за Си-Ен-Ен дека е запознаен со извештаите, но рече дека не е во позиција да ги потврди.
