Украинскиот претседател Володимир Зеленски во неговото обраќање до донорската конференција на ЕУ за Украина упати барање за средства и забрзана процедура за членство на земјата во ЕУ.
Конференцијата ја организираат Полска и Шведска во рамките на ЕУ. Целта е да се соберат средства за да и се помогне на Украина да се справи со последиците од војната со Русија.
Зеленски се обрати кусо на почетокот на конференцијата со барање за забрзана процедура за членство во ЕУ, што ја нарече „специјална процедура“ за членство.
– Членството на Украина мора да биде апсолутна реалност, не само ветувања и перспективи туку практични чекори, јас го знам тоа, и вие го знаете, мнозинството меѓу вас го разбира ова, изјави Зеленски пред присутните лидери на ЕУ, меѓу кои премиерите на Шведска, Полска, како и претседателите на Европскиот Совет и на Европската Комисија, Шарл Мишел и Урусла фон дер Лајен.
Премиерот на Украина, Денис Шимал, во својот говор го повтори ова барање, велејќи дека Украина сака членство во ЕУ веднаш, и дека „во одбрана на ЕУ„ ја води оваа војна.
