Александар Вучковски - сомелиер: Како македонските вина го освојуваат светот? ↓↓↓
Во период од една недела бројот на позитивни случаи на Ковид-19 е зголемен за околу 65 проценти. Засега, Комисијата за заразни болести не препорачува нови мерки, а остануваат да важат актуелните мерки за задолжително носење маска во јавниот превоз, здравствените домови, аптеките, старечките домови и домовите за лица со попреченост.
Во изјава за МИА, портпаролот на Комисијата за заразни болести, д-р Злате Мехмедовиќ вчера истакна дека со цел да се донесат нови мерки потребно е да се следат и други параметри, како што се болничките капацитети и бројот на починати од дневните ковид-статистики.
„Комисијата за заразни болести во изминатиот период најави дека мерките што ќе се носат, а ќе бидат во насока на превенција и ќе бидат согласно параметрите што ги следиме од Центарот за контрола за болести, а тоа не е само бројката на новозаразени, туку се и болничките капацитети, односно исполнетоста на болниците, како и бројот на починати што се регистрираат согласно дневните ковид статистики“, вели Мехмедовиќ.
Во тек е и вакцинацијата за четврта доза против коронавирусот. Чевртата доза можат да ја примат сите граѓани над 18-годишна возраст кои примиле три дози вакцина против ковид-19, на сите вакцинални пунктови без закажување.
Вакцинацијата со четврта доза, како што соопшти Министерството за здравство, е предвидено да се спроведува со мРНА вакцина на „Фајзер“ или „Модерна“. Препорачаното растојание меѓу трета и четврта, односно бустер доза е најмалку четири месеци.
„Вакцинацијата со четврта доза посебно се препорачува кај хронично болни, пациенти на дијализа, трансплантирани, онколошки пациенти, имунокомпромитирани и пациенти кои примаат имуносупресивна и имуномодулаторна терапија за која било индикација и кај лица над 60 години. Вакцинацијата е најдобра превентивна мерка за заштита од потешка форма на вирусот ковид-19. Државата располага со доволни количини вакцини, кои се безбедни и ефикасни и ги повикуваме граѓаните да се имунизираат во вакциналните пунктови со вакцина против ковид-19, со цел да стекнат дополнителен имунитет“, велат од Министерството за здравство.
Болничките услови на Клиниката за инфективни болести, како што информираше портпаролот на КЗБ Мехмедовиќ засега не се исполнети и има доволно болнички капацитети што можат да се стават на располагање, но зголемен е бројот на амбулантни прегледи на Клиниката.
Доколку има промена во епидемиолошката состојба, како што посочи Мехмедовиќ, ќе бидат разгледани параметрите и Комисијата ќе препорача нови мерки за заштита од вирусот.
Во текот на вчерашниот ден, согласно податоците од Институтот за јавно здравје направени се 1.129 тестови, регистрирани се 355 случаи на ковид-19, од кои 89 се реинфекции. Активни се 1.474 случаи на коронавирусот.
Пријавено е едно починато лице од Скопје, во болнички услови, а согласно Регистарот на умрени лица со дијагноза ковид-19 од Мој Термин регистрирано е едно починато лице од Струга (78г), починат во домашни услови на 30 јуни.
Податоците од Институтот за јавно здравје покажуваат дека во моментов во Скопје има најголем број активни случаи – 783, а Македонска Каменица, Пехчево, Дојран немаат позитивни лица на вирусот.
