Александар Вучковски - сомелиер: Како македонските вина го освојуваат светот? ↓↓↓
Тројца од шестмината пратеници кои се осомничени од Јавното обвинителство во истрагата за упадот во Собранието на 27 април добија 30 дневен притвор од судот, додека тројца нема да смеат да го напуштат својот дом.
Пратениците на ВМРО-ДПМНЕ Крсто Мукоски, Љубен Арнаудов и Сашо Василевски добија мерка притвор од 30 дена на денешниот распит во Кривичниот суд во Скопје. Тројцата нивни колеги од законодавниот дом, Жаклина Пешевска и Јохан Тарчуловски од ВМРО-ДПМНЕ, како и Љупчо Димовски од Социјалистичката партија добија мерка домашен притвор. Тие имаат право на жалба во следните 24 часа.
Јавното обвинителство осомничи 36 лица за делото „терористичко загрозување на уставниот поредок“ поради упадот и крвавото насилство во Собранието на 27 април годинава. Пратениците кои се осомничени од обвинителството се појавија на видео снимки од безбедносните камери кои го регистрирале нивното движење на критичниот ден. Неколкумина од нив можат да се видат како ги отвораат вратите на Собранието и ги насочуваат луѓето од толпата кои влегуваат во парламентот.
Од ВМРО-ДПМНЕ веќе неколку дена протестираат против одземањето на имунитетот на нивните пратеници и заканата од одредување на мерката притвор.
Во петокот, на 1 декември, Собранието со мнозинство гласови изгласа одземање на имунитетот на пратениците, откако ден претходно таквата одлука мина и во Комисијата за деловнички и мандатно-имунитетни прашања.
Осомничените пратеници подолго време тврдат дека немале никаква улога во упадот во Собранието.
