Диск голф го освојува светот, а го нема во Македонија!? ↓↓↓
Од страна на клиниката за трауматологија и ортопедски болести, објавен е тендер во петокот за возило кое треба да има пет врати, минимум 5 места за седење, моторот да биде дизел, а работната зафатнина да биде минимум 1.950 кубни сантиметри. Максималната цена треба да биде 2.16 милиони денари односно 35.000 евра.
Новиот директор на клиниката, Илир Хасани вели дека автомобилот се набавува за непречено вршење на директорската функција.
„Автомобилот се набавува за директорот, поточно за мене. Оваа набавка е планирана да се реализира следната година, а претходно е одобрена од Управниот одбор на Клиниката. Во склоп на нашата Клиника, која всушност е составена од четири големи клиники, влегува и ортопедската болница за новороденчиња и деца Мајчин дом во Аеродром. Досега никако не успеав да најдам форма да ангажирам возач, кој ќе може да ме вози во мојот приватен автомобил и затоа ќе набавиме автомобил за потребите на кабинетот на директорот“, вели Хасани.
Во спецификацијата за набавка на автомобилот од 35.000 евра стои дека моќноста на возилото треба да биде 110 киловати, како и да биде со стандард од евро 6, или еквивалентно на тоа. Должината на возилото треба да биде минимум 4.850 милиметри, широчината да биде минимум 1.850 милиметри, а височината да биде минимум 1.470 милиметри. Растојанието меѓу оските, според техничката спецификација треба да биде минимум 2.800 милиметри, а багажниот простор да има капацитет од минимум 500 литри. Бојата на возилото, како што стои во тендерската документација треба да биде металик по избор.
Меѓу задолжителната минимална опрема, според техничката спецификација на набавката, возилото треба да има ксенон или лед предни светла, радио, клима уред, централен потпирач за патниците на задните седишта, роло завеси на задните стакла и паркинг сензори со камера за паркирање назад.
Оваа клиника, според Хасани веќе две до три години е без автомобил за директорот, бидејќи старото возило се расипало и е расходувано. Тој вели дека плаќањето на возилото ќе се одвива во наредните четири до пет години, бидејќи се плаќа на лизинг, а дали ќе се реализира набавката ќе зависи и од буџетот што Клиниката за трауматологија, ортопедски болести, анестезија, реанимација и интензивно лекување и ургентен центар ќе го добие од Фондот за здравствено осигурување.
„Сѐ уште не се завршени преговорите од Фондот и не знаеме колкав буџет ќе добиеме. Нашата Клиника, како и сите други има долгови, но најголемиот проблем за работењето на клиниката е во тоа што сите тендери за набавки на потрошни материјали и лекови, кои требало уште лани да се реализираат, не знам од која причина претходниот директор не ги завршил. Сега ги реализираме сите тие тендери. На работ на неработење сме, кубуриме и со материјали и со лекови и позајмуваме од другите клиники за да може да работиме. Оваа набавка на возило ќе овозможи нормално да функционира кабинетот на директорот, бидејќи според обемот е најголема клиника во Скопје“, вели Хасани.
