Диск голф го освојува светот, а го нема во Македонија!? ↓↓↓
Од вечерва стапува на сила полицискиот час кој ќе трае од 21 часот до 6 часот наутро, а е воведен од страна на Владата како превентивна мерка за борба и спречување на ширењето на коронавирусот во Македонија.
Граѓаните не смеат да излегуваат во овој период. Полицискиот час нема да важи за МВР, армијата, пожарната и дежурни лица кои работат во Комунална хигиена. Рестриктивната мерка за заштита од корна вирусот има и одредени исклучоци за одредена група граѓани – лица на кои им е потребна итна медицинска помош, како и за оние пациенти на кои им е потребна дијализа. Директорите на болниците треба да направат списоци на вработени кои треба да се движат додека е во сила полицискиот час и за нив ќе има посебни пропусници.
„Една од професиите која ќе биде ислучена ќе бидат медиумите и новинарите. Денеска треба да се дефинира како да се организира начинот да не се влијае на брзината на работата на медиумите, а тој да биде ефикасен и за институциите“, изјави Радмила Шекеринска.
Заменик-министерот за внатрешни работи, Агим Нухиу за Алсат најавува – постои можност за заострување на полицискиот час ако бројот на болни од Ковид 19 се зголемува, а препораките за седење дома не се почитуваат.
„Ќе имаат прекршочна одговорност ако при постапување на полицијата ќе се увидат други кривични дела, граѓаните ќе можат и кривично да одговараат“, рече Нухиу.
Во контрола на безбедносната состојба и поддршка на полицијата во справувањето со коронавирусот се вклучува и армијата. Формиран е заеднички штаб. АРМ ќе ја преземе контролата на граничната линија, ќе ги обезбедува Владата, Собранието, затворите. Војската и полицијата заедно ќе контролираат дали се почитува полицискиот час.
„Армиски тимови ќе можат да спроведуваат и контрола на почитувањето на полицискиот час, почитувањето на самоизолацијата и доколку самоизолацијата не се почитува, да веднаш се изрекуваат мерки, но и да се упатат овие лица во државен карантин и државна изолација“, рече Радмила Шекеринска, Министер за одбрана.
Во услови кога во земјава се воведува рестриктивна мерка како полициски час, а препораките на лекарите и владата е да се седи дома, во полза на повиците за изолација следниве денови ќе биде и лошото време. Убавите сончеви денови во кои граѓаните уживаа изминативе денови завршуваат вечерва. Снег и дожд е прогнозата на синоптичарите за следните неколку денови низ државава – временски услови кои треба да го намалат движењето на отворено.
„Не очекувам снежна покривка да се формира во градското подрачје, меѓутоа врнежите во Скопје, ќе преминат и во снег уште во текот на ноќта а и утре ќе има повремен снег. Тоа е за следните два дена. Од среда попладне се очекува благо затоплување, па до крајот на работната седмица ќе се задржи облачно време со врнежи од дожд“, рече Костадинка Арсовска, УХМР.
