Александар Вучковски - сомелиер: Како македонските вина го освојуваат светот? ↓↓↓
Украина јавно го осуди новиот декрет потпишан од претседателот на Русија, Владимир Путин, со кој на Украинците во сите делови на земјата им се дозволува да добијат руско државјанство.
„Споменатата уредба е уште едно нарушување на суверенитетот и територијалниот интегритет на Украина, некомпатибилно со нормите и принципите на меѓународното право“, соопшти на 11 јули украинското Министерство за надворешни работи.
Во декретот потпишан на 11 јули се наведува дека сите украински државјани и лицата без државјанство што живеат во Украина можат да добијат руски пасоши. Истата поедноставена процедура беше воведена од Москва во 2019 година за жителите на регионите Доњецк и Луганск, чии делови се под контрола на сепаратистите поддржани од Кремљ од 2014 година.
Од 25 мај, тој се применува и за жителите на два украински региони, Херсон и Запорожје, чии делови беа окупирани за време на руската инвазија. Одредбата сега важи за цела Украина.
Проширувањето „значи дека окупациските планови на Русија немаат географски ограничувања“, напиша на Твитер Марија Золкина, раководителка на студии за регионална безбедност и конфликти во Фондацијата за демократски иницијативи во Киев.
Путин и другите руски претставници инсистираат дека целта на инвазијата не била окупација на Украина. Сепак, Москва и властите наметнати од Русија на окупираните украински територии сега велат дека тие региони би можеле да станат дел од Русија.
Властите инсталирани од Русија на окупираните територии на украинските региони Херсон и Запорожје претходно соопштија дека формирале центри за издавање пасоши за украинските граѓани што избрале да добијат руски пасоши.
Во регионите Луганск и Доњецк, познати како Донбас, сепаратистичките лидери претходно изјавија дека стотици илјади локални жители добиле руско државјанство од 2019 година.
