Александар Вучковски - сомелиер: Како македонските вина го освојуваат светот? ↓↓↓
Предлог-законот за амнестија за обвинетите во рамки на случајот со „крвавиот четврток“ за брзо влегува во собраниска процедура.
Обвинетите по неговото усвојување ќе имаат рок од пет дена да поднесат барање за амнестија, а дали тоа ќе биде прифатено одлуката ќе ја носат надлежниот обвинител и судија.
Интерпартиската парламентарната група за реформи, интеграција и помирување го одобри нацрт-предлог законот за амнестија и тој за брзо време да влезе во собраниска процедура, изјави кородинаторката на групата и пратеничка на СДСМ, Фросина Ременски. Законот, според неа, ќе биде усвоен пред завршувањето на судскиот процес за настаните од 27 април, при што обвинетите ќе имаат рок од пет дена да поднесат барање за амнестија.
Во законот, како што информираше Ременски, ќе бидат опфатени оние кои што не може да бидат амнестирани, како организаторите и оние кои учествувале во подготовката, насилниците, тие коишто носеле оружје и експлозивни направи и службените лица кои ги прекршиле нивните овластувања. За тоа, кој ќе биде амнестиран ќе оценува надлежниот обвинител и Судот, додаде Ременски.
„Оттука и во следните чекори и процесните аспекти на остварување на правото на амнестија на секој обвинет за настаните поврзани со 27 април е индивидуално. Значи се поднесува барање до надлежен обвинител и до Суд. Судот го носи решението по претходно мислење на јавниот обвинител, надлежен за случајот. Оттука ние воопшто не се ни обидуваме, ниту пак сакаме да вршиме било какво ограничување на правото и надлежноста на Обвинителството и на Судот, да ценат врз основа на какви докази располагаат за лицата коишто ќе поднесат индивидуално барање согласно овој закон“, рече Ременски.
Во предлог-законот не се прецизирани кривичните дела кои влегуваат во амнестијата, посочи Ременски, која не сакаше да коментира дали треба да бидат амнестирани и обвинетите пратеници.
Извор: Радио Слободна Европа
