Александар Вучковски - сомелиер: Како македонските вина го освојуваат светот? ↓↓↓
Исланд ја совлада Македонија со 30:29 (16:16) во четвртото квалификациско коло за пласман на Европското ракометно првенство во Хрватска во 2018 година и од дното го презеде врвот на табелата во групата 4.
Реваншот во Рејкјавик имаше сличности што на крајот беа во прилог на домашната селекција. Македонија и во „Лаугардалсхол“ почна одлично како и во СЦ „Борис Трајковски“. Кон средината на првиот дел имаше водство со три гола во два наврата (9:6 и 10:7) и игра што ветуваше прекинување на непријатната традиција од пет порази во исто толку гостувања досега на далечниот континентален север. Но, се случи и шестиот.
Исланѓаните наметнаа свој ритам, постојано имаа предност што на моменти во продолжението изнесуваше и четири гола разлика. Македонија, сепак, не загуби глава и постојано му дишеше во врат на противникот и успеа да го внесе мечот во неизвесен финиш. Меѓутоа не и да го сврти резултатот, а ривалот умешно ја сочува гол предноста за која ја „грицкаше“ последната минута од мечот.
Најефикасен на натпреварот беше Кире Лазаров со осум гола, Манаков додаде 7 колку и Гудмундсон за Исланд, репрезентација во која се истакна и Карасон со шест реализации.
Сите четири селекции во групата 4 сега имаат по две победи и два пораза пред последните две. „Црвено-жолтите“ во претпоседното коло, на 14 јуни, ги очекува уште едно гостување во Украина пред средбата со Чешка четири дена подоцна во Скопје.
Исланд – Македонија 30:29 (16:16)
Сала: „Лаугардалсхол“ во Рејкјавик. Гледачи: 1.750. Судии: Зигмарс Сондорс и Ренарс Лицис (двајцата од Летонија).
Исланд: Густавсон 2, Нилсен, Кристјансон, Палмарсон 3, Карасон 6, Халгримсон 2, Атласон, Сигурдсон 3, Гудмундсон 7, А. Гунарсон 3, Арнарсон 3, Елисон 1, Б. Гунарсон, Сигурбјерсон, Магнусон, Смарасон. Селектор: Геир Свеинсон.
Седмерци: 1/3. Исклучувања: 8 минути.
Македонија: Митревски, Ристовски 1, Манасков 7, Стоилов 3, К. Лазаров 8, Митков, Талески, Миркуловски 6, В. Маркоски, Н. Маркоски, Георгиевски 1, Ф. Лазаров 3, Ојлески, Кузмановски, Нелоски, Пешевски. Селектор: Раул Гонзалез.
Седмерци: 1/1. Исклучувања: 10 минути.
Квалификации за ЕП 2018 – Група 4
Резултати, 4. коло
Исланд – Македонија 30:29
Чешка – Украина 32:25
Табела: Исланд 4, Македонија 4, Чешка 4, Украина 4.
Идно коло: Чешка – Исланд (14 јуни), Украина – Македонија (15 јуни)
