Александар Вучковски - сомелиер: Како македонските вина го освојуваат светот? ↓↓↓
На денот кога се чествуваат сесловенските просветители Св. Кирил и Методиј, беше промовирана инклузивната сликовница „Буква по буква – азбука“ од страна на Владата. Сликовницата е напишана на кирилично, брајово и знаковно писмо. На промоцијата се обратија премиерот Зоран Заев, авторката на сликовницата Гордана Симоновска- Момировска и авторот Горјан Петрески.
Поетесата за деца и млади, а воедно и авторка на инклузивната сликовница, „Буква по буква – азбука“ Гордана Симоновска- Момировска, истакна дека ова е втора инклузивна сликовница на која работи.
„Само кога би знаеле колку многу љубов, трпение, внимание, енергија, време и надеж за поддршка се вложени во овие страници. Тука на едно место, ќе ги запознаете сите три форми на азбуки со кои луѓето со и без попреченост комуницираат меѓусебе. Во случајов зборуваме за кириличната, брајовата и знаковната азбука. Брајовата и знаковната азбука испечатени се на крупен фонт за да се задоволи целосната читателска публика. Велат дека познавањето на туѓите јазици е вистинско богатство, но тогаш кога ќе умееме да ги препознаеме и формите на азбуките со кои што се општи, верувајте тогаш тоа богатство станува бесценето“, изјави Гордана Симоновска- Момировска.
Таа информираше дека македонската верзија на сликовницата „Буква по буква – азбука“ веќе од утре ќе биде достапна за читателската публика, а со секоја купена сликовница, ќе се донира за хуманитарните активности што ги спроведува здружението на граѓани „Различни, а еднакви“.
Дел од собраните средства ќе бидат донирани и во Сојузот за слепи лица од Велес, за да се набави машина за печатање на брајово писмо.
На промоцијата свој говор имаше и рецензентот на делото, авторот Горјан Петревски, кој истакна дека за прв пат глаголиво и григорливо се оживеани 31 буква од нашата азбука.
„Промовираме инклузивна сликовница чиј наслов „Буква по буква – азбука“ стои кирилична, брајова и знаковна и со самото тоа е своја на своето и го допира светот на „Различни, а еднакви“ кои со години како нејзин претседател го води хуманистката и поетеса Гордана Симоновска Момировска. Таа со сета своја хуманост светот го гледа со искрени очи за еднаквост и недискриминација“, истакна тој.
„За своја основна цел, со својот основен печат, сликовницата на кирилично видно и кирилично брајово писмо ќе биде пристапна и за лицата со оштетен вид да може само да им читаат на своите деца и своите внуци. Стиховите се поставени на чиста позадина, со крупен фонт, што го олеснува читањето и за слабовидните лица. Уште една дополнителна, а многу голема вредност на оваа сликовница е што децата, а и возрасните без пречки во видот, имаат можност покрај своето да го запознаат и брајовото писмо“, истакна премиерот.
Тој нагласи дека сликовницата е издадена како дел од проектот „Правото да читаш не е посебна потреба“, на здружението граѓани „Различни, а еднакви“, а е испечатена со поддршка на „Европа 92“ – Кочани и Сојузот на слепи лица – Велес.
„Посебна симболика претставува што промоцијата на оваа сликовница се одржува на Денот на сесловенските просветители Св. Кирил и Методиј, кои пред повеќе од 12 века спроведоа неколку мисии во Мала Азија и Европа, откако претходно ја создадоа глаголицата на која ја преведоа Библијата за да го шират словот Христово на јазик близок до словенските народи“, додаде Заев.
