Пендаровски денес пред Макрон со македонските аргументи контра француското вето


Вака се слави гол во 120-та минута!!! ↓↓↓


Во рамки на неговото учество на Парискиот мировен договор, македонскиот претседател Стево Пендаровски денес ќе оствари средба со шефот на француската држава Емануел Макрон, пред кој ќе ги изнесе македонските аргументи против француското вето за доделување датум за почеток на пристапни преговори меѓу Македонија и ЕУ.

Пендаровски на средбата со Макрон ќе има можност директно од него да ги слушне ставовите на Франција за проширувањето и за новата методологија на преговарање.

Тој минатата недела изјави дека средбата со Макрон е добра можност да се изложат аргументите на двете страни и да ги слушнат мотивите на францускиот претседател. Посочи и оти ние како земја немаме никаква резерва спрема најавената нова методологија.

Пендаровски исто така рече дека во наредниот период треба да добиеме посилен сигнал дали наскоро ќе може да се измени крајно неповолниот исход на последниот европски самит, пред сè Франција, која беше против почеток на пристапните преговори со Северна Македонија и со Албанија.

Шефот на државата оцени да не се оди со преголеми очекувања од средбата, бидејќи, како што рече, иако сме мала држава и имаме силни аргументи, сепак ниту Америка, ниту Германија, никој никогаш не може да го убедува претседателот на Франција.

Париз инсистира на претходни внатрешни реформи во ЕУ и промена на методологијата за прием на нови земји членки.

Минатата седмица, францускиот амбасадор во земјава Кристијан Тимоние на новинарско прашање за очекувањата од средбата меѓу претседателот Пендаровски и шефот на француската држава Макрон во Париз и дали тоа ќе придонесе за поголема динамика во македонско-француските односи, не сакаше да даде коментар.

„Во сè она што е комуникација околу таа официјална посета, сепак би ве упатил на претседателството на Републиката, затоа што сметам дека не би било куртоазно од моја страна однапред да говорам за тоа“, вели Тимоние.