На 3 јули во Демир Капија ќе се обележи 100 годишнината од изградбата на тунелот и патот низ Демир Капијската клисура со велосипедско дружење.

„Првата светска војна има оставено бројни културни обележја на територијата на Македонија. Но овој претставува обележје кое ден денес се употребува и создал можност за развој на Демир Капија. Па дури и нас, велосипедистите не привлекува како прекрасна велосипедска рута.“ вели Бојан Ранташа од Велосипедскиот кружок „Милтон Манаки“.

Велосипедската дружба по патот низ Демир Капијската клисура ќе започне од 9:30 часот наутро, токму пред тунелот низ Клисурата кој се наоѓа по стариот пат кој поминува низ градот Демир Капија. Оттаму учесниците ќе се придвижат кон југ по 100 години стариот пат, се до село Миравци и локалитетот Бел Рај. Попатно ќе се ужива во пејсажите на Демир Капијската клисура а на крајот кој сака ќе може да се избања во вировите на Стара Река. Рутата е долга 28 километри и промовира бавен велосипедизам во кој учесниците уживаат и се запознаваат со секој поглед и со секое нешто по патот.

Пред 100 години, поточно на 1 мај 1916 година, инженерскиот кор на 11 Армија на Германската војска започнала со изградбата на патот, по наредба на Вилхелм II – Цар на Германија, Крал на Прусија. По само два месеци и осум дена, на 8 јули 1916 година патот е отворен за сообраќај и со тоа се пробил патот покрај Вардар кон Гевгелија.

„За значењето на патот за Демир Капија важно е да се каже дека денеска тој е една од главните европски, велосипедски, туристички артерии. Имено рутата Еуро Вело број 11 поминува токму по овој пат и Демир Капија ја поврзува се до Нордкап, Норвешка на север и Атина, Грција на југ.“ вели Васил Тодоров, директор на Центарот за едукација и вмрежување во туризмот ЦЕНЕТ од Демир Капија. Еуро Вело 11 рутата од Европските велосипедисти е прогласена за „Најдоброто од Истокот“ со оглед на должината и земјите кои ги поврзува, а по рутата се движат бројни велосипедски туристи кои патуваат од Западна и Северна Европа кон Грција, па и Азија.

Интересни се приказните околу тунелот, така Славко Колев од Спорткиот клуб „Клисура“ од Демир Капија ни споделува дека „Под посветата за Царот Вилхелм II, имало пишано дека тунелот го изградил Генералот Август фон Мекензен, така и се викал тунелот – Мекензен Тунел. Во 1918 година Французите пак по пробивањето на фронтот ставиле свој натпис кој пак е избришан во Втората Светска Војна од Германците.“
Настанот е во организација на Велосипедскиот кружок „Милтон Манаки“ како дел од Центарот за одржливи иницијативи, во соработка со Центарот за едукација и вмрежување во туризмот на Демир Капија и Спортски клуб „Клисура“ – Демир Капија, а со поддршка на Општина Демир Капија и Амбасадата на Сојузна Република Германија во Скопје. Учеството на секој велосипедист е добредојдено.

Оваа година и токму овој настен одбележува уште еден значаен момент. А тоа се 200 години од појавата на првата идеја за создавање на велосипед од страна на германскиот измумител Карл Драјс. Тој во обид да се справи со недостатокот на коњи летото 1816 година доаѓа до првата идеја за нешто што е наречено „одечка машина“ – велосипед без педали. Тој оваа машина за прв пат ја пробува на 12 јуни 1817 година и создава цела култура на страствени вљубеници на велосипедите која ден денес постои.

За понатамошни информации, Ве молиме контактирајте ги:
Вања Ичкова [email protected], 070 724797
или
Бојан Ранташа [email protected], 070 876353

За Велосипедскиот кружок „Милтон Манаки“:
Велосипедскиот кружок е формиран во 2014 година како секција при Центарот за одржливи иницијативи – Скопје.
Тоа е Велосипедски кружок за бавно возење велосипед со цел да го промовира велосипедизмот како секојдневно, нормално, превозно средство.
Велосипедскиот кружок има 42 члена и секој месец организира велосипедски дружби за своите членови.

За ЦОИ:
Центарот за одржливи иницијативи основан е во 2008 година.
Неговата мисија е да овозможи одржлив развој на заедницата во Македонија обезбедувајќи стручност и поддржувајќи граѓански иницијативи.

Со претставата „Име“ во режија на Ненни Демлестре на театар „Комедија“ и со традиционалното врачување на наградите за животно дело, во петокот вечерта во Центарот за култура „Марко Цепенков“ во Прилеп започна 51-от Македонски театарски фестивал „Војдан Чернодрински“.

„Фестивалот го помина првото петдецениско постоење и годинава зачекоривме во второто петдецениско живеење на Македонскиот театарски фестивал „Војдан Чернодрински“. Направив селекција од 12 претстави во официјалната конкуренција за награди и се раководев само од квалитетот што го нудат македонските професионални театри. А македонскиот театар постојано бележи нагорна линија и според квалитет и квантитет, зашто сите ансамбли се обновени со млади актери и творци, истакна претседателот на Собранието на фестивалот и селектор Петар Темелковски.

Сите осум фестивалски дена ќе биде понудена богата програма. Освен 12 претстави во официјална конкуренција има и 10-тина претстави во придружната програма. Ќе бидат организирани и изложби и промоции на драмски текстови што се наградени од Министерството за култура, како и полноќни претстави за сите генерации.

Според градоначалникот Марјан Ристески: Фестивалот „Војдан Чернодрински“ претставува голема потврда дека трајните вредности и нивното негување се од особен интерес за градот Прилеп, за Министерството за култура, за Република Македонија. Токму затоа градот Прилеп претставува епицентар во кој се случуваат културни збиднувања и настани носејќи го космополитскиот дух на уметноста, а за тоа најмногу придонесува овој фестивал на театарот“.

Годинашни добитници за животно дело се: театарскиот критичар Лилјана Мазова, како и актерите Илијаме Билјали од Албанскиот театар и Сабина Ајрула од Драмскиот театар од Скопје. Идниот петок, Македонската опера и балет за првпат на фестивалот ќе ја изведе операта „Кармина Бурана“ во чест на наградените.

Покровители на фестивалот се Министерството за култура и градот Прилеп.

Пред почетокот на фестивалот љубителите на ликовната уметност имаа можност да присуствувват на отварање на изложбите на Владимир Темков и Атанас Ботев.