Доцна синоќа, пред полноќ, на крстосницата меѓу булеварот „Партизански одреди“ (во правец кон Центар) и улицата „Париска“ во Скопје, превртен е автомобил со скопски регистерски таблички, марка Голф 5 (сива-металик боја), при што од возилото е извлечен 46-годишниот Даниел Трајковски, во тешка здравствена состојба, кој веднаш, со Брза Помош бил префрлен во Ургентниот центар, на Клиниката за анестезиологија, реанимација и интензивно лекување (КАРИЛ) во Скопје.

Идентитетот на Трајковски официјално не е потврден од МВР, но, со сигурност се знае дека тој е сопственик на возилото.

Според неофицијални информации на „24 Вести“ на сообраќајката и’ претходела бркотница со автомобили, која очевидци ја забележале од кај бензинската станица „МакПетрол“ во населбата Карпош 3, при што било пукано од второ, засега непознато возило во движење, по што, откако бил ранет Трајковски, ја изгубил контролата врз својот автомобил и удирајќи во бетонска жардиниера од булеварот „Партизанска“, се превртува неколку пати. Сторителот засега е во бегство и е непознат за полицијата.

Мотивите за нападот не се познати засега, но, не се исклучува можноста за некаква одмаздничка акција.

Даниел Трајковски инаку, и досега во МВР пријавувал обид за напад врз него, а при последната пријава лани, сведочел дека бил пресретнат од црн автомобил „Пасат“, од каде сакале да пукаат на него.

Според неофицијални болнички извори, ранетиот Трајковски бил погоден со четири куршуми – во слезината, градите и во вратот, при што веројатно му е отстранета слезината. Трајковски бил во свесна состојба и ќе биде хоспитализиран во следниот период поради закрепнување.

Повеќе информации и детали, надлежните најавуваат во текот на денешниот ден.

(Видеото е во сопственост на телевизија 24 Вести)

Гостиварец, вработен во подружницата на Македонска пошта во Гостивар крадел пари од туѓа сметка, при што присвоил вкупно 238.749 денари.

Полицијата поднесе кривична пријава против Б.М. (34) од Гостивар, шалтерски работник во Македонска пошта – Подружница ЦРПС Гостивар, поради постоење основи на сомнение за сторени кривични дела „злоупотреба на службената положба и овластување“ и „злоупотреба на лични податоци“.

Пријавениот во периодот од 30.07.2016 година до 02.09.2016 година, искористувајќи ја службената положба, во пет наврати и злоупотребувајќи ги личните податоци на физичко лице од Гостивар, при исплата на парични средства во три наврати, противправно ги присвојувал паричните средства од касата на работно место, без за истото да го извести надлежниот субјект во подружницата. На овој начин пријавениот присвоил вкупно 238.749 денари.

Педесет годишна жена се удави откако паднала во река, а нејзината мајка, која била со неа, не успеала да ја спаси.

Како што соопшти полицијата, М.Р. (70) со нејзината ќерка Н.Р. излегле од дома и се упатиле на м.в. „Сисвети“. При обид да ја поминат реката Н.Р паднала во водата, а нејзината мајка се обидела да ја извлече, но не успеала. М.Р. побарала помош од најблиската куќа, а лицето М.М. (40) со уште две лица ја пронашле Н.Р. која не давала знаци за живот. Истата ја ставиле во ќебе и со возило ја однеле во нивната куќа, каде од страна на матичниот лекар била констатирана смрт без видливи знаци за насилство.

По извршениот преглед од страна на вешто лице од судска медицина констатирано било дека причината за смртта е давење во вода и смрзнување. Увид на местото на настанот извршиле Јавен обвинител и увидна екипа од ПС Гостивар. Со согласност на Јавен обвинител, телото на починатата е предадено на семејството за погреб.