Адриано Галиани после 30 години во декември ќе го напушти Милан, па многу фудбалски клубови ширум Европа го сакаат „ќелавкото“ во своите редови.

Галиани важи за еден од најдобрите и најпочитуваните фудбалски работници во светот, па покрај интересот на Флорентино Перез, и минхенски Баерн сака да го има Италијанецот во своите редови.

Тоа го откри Анчелоти кој потврди дека Румениге и Галиани се големи пријатели и дека Германецот го поканил на вечера и на сериозен разговор актуелниот директор на Милан.

„Разговарав со Галиани пред неколку дена и знам дека заминува од Милан. Овде во Баерн сите го почитуваат Адриано, а посебно Румениге со кого се одлични пријатели. Ќе ви откријам дека Румениге го покани Галиани на вечера во Минхен на која ќе присуствувам и јас. Галиани е Роналдо меѓу директорите, секој клуб би сакал да го има во своите редови“, истакна Анчелоти.

Галиани во разговор за „Газета дело Спорт“ потврди дека има понуди од неколку клубови, но сеуште нема донесено одлука.

„Имам понуди од неколку клубови, но сеуште не сум донел одлука. Едно е сигурно, нема да работам во друг италијански клуб бидејќи моето срце чука само за Милан“, изјави Галиани.

Лоши вести за Арсенал и Арсен Венгер кој во следните четири недели нема да може да смета на десниот бек Хектор Белерин.

Одличниот дефанзивец се повреди за време на лондонското дерби против Тотенхем, а деталните прегледи покажаа дека ќе биде надвор од терените еден месец.

Станува збор за повреда на коленото, па Белерин ќе ги пропушти натпреварите против Манчестер Јунајтед, Бурнмаут, Саутемптон и Вест Хем во Премиер лигата, како и натпреварот со ПСЖ во Лигата на шампиони.

Аталанта оваа сезона игра одлично во Серија А, а најголемо откритие во тимот од Бергамо е младиот играч за врска, Франк Кесие.

19-годишниот Кесие игра фантастично и го привлече вниманието на многу европски гиганти, а медиумите во Италија тврдат дека Јувентус ја победил конкуренцијата и дека е пред реализација на трансферот.

Имено, „бјанконерите“ веќе го договориле трансферот со Аталанта и за потписот на Кесие ќе платат 20 милиони евра. Единствено не е познато дали фудбалерот ќе се пресели во Торино во јануари, или ќе остане во Аталанта на позајмица до крајот на сезоната.

„Старата дама“ уште во летниот преоден рок понуди 10 милиони евра за неговиот потпис, но Аталанта ја одби понудата а фудбалерот буквално експлодира оваа сезона во Серија А.

Менаџерот на Ливерпул, Јирген Клоп застана во одбрана на Вејн Руни и истакна дека во минатото фудбалерите пиеле како ѓаволи и пушеле како луди.

Сликите од пианиот Вејн Руни се најдоа на насловната на „Сан“, по што напаѓачот беше приморан да се извини.

На денешната прес конференција Јирген Клоп беше запрашан за овој инцидент, а харизматичниот Германец како и секогаш имаше извонредна изјава.

„Се извинил поради тоа што испил некоја чашка било што? Навистина ми е жал за играчите. Сите лесно забораваат дека фудбалерите се само обични луѓе. Можам да кажам дека оваа генерација е најпрофесионалната генерација на фудбалери која сме ја виделе”, заклучи Клоп и додаде:

„Сите легенди кои ги сакате и ги обожавате, тие пиеја како ѓаволи и пушеа како луди. Но и покрај тоа беа одлични фудбалери. Сигурен дека Вејн не направил ништо сериозно. Но таков е фудбалскиот свет во кој живееме, постојано сме под лупа. За ден, два или неколку недели никој нема да зборува за ова”.