Овој рудник во Русија вреди 15 милијарди евра – дознајте што ископуваат во него

Рудникот за дијаманти „Мир“ во Сибир е толку голем што со право го носи името „најскапа дупка во светот”. Длабочината на кратерот изнесува 525 метри, а обемот 1.600 метри.

Поради длабочината над него е воведена строга забрана за летање, бидејќи вртлогот може да ги повлече хеликоптерите и другите летала.

Вредност на „Мир“ се проценува на 15 милијарди евра. Во овој рудник, кој се наоѓа на 8.000 километри источно од Москва, во текот на 2014 година биле ископани дури шест милиони карати дијаманти.

Рудникот е сопственост на руската компанија „Алроса”, која пласира една четвртина од вкупното светско годишно производство на дијаманти.

Рудникот го опкружува град со 35.000 жители. Една од нив е Ајталина, која е родена и пораснала во Јакутск. Таа со сопругот и двете деца таму се доселила пред осум години.

– Кога се омажив со Генадиј, често се селевме поради неговата работа. Мислев дека ќе пливам во дијаманти. Тој тогаш ми објасни дека сите дијаманти што ги пронаоѓа ѝ припаѓаат на државата и дека целиот процес е строго контролиран. Џебовите не ни се полни со дијаманти, но живееме подобро отколку во Јакутск – вели таа.

Најголемите пронајдени дијаманти во овој рудник биле со големина на топчиња за голф.