Александар Вучковски - сомелиер: Како македонските вина го освојуваат светот? ↓↓↓
Индискиот милијардер Гаутам Адани, кој со вртоглава брзина се искачува на листата на најбогатите луѓе во светот, го надмина Џеф Безос со своето богатство, кој досега беше вториот најбогат човек на светот.
На Адани му биле потребни само 10 месеци да се пресели од 14-тото место на листата, на второто место со богатство од 146,9 милијарди долари. Прв на листата на Блумберг и натаму е Илон Маск, кој е „тежок“ 260 милијарди долари.
Ова е првпат некој од Азија да се истакне толку високо во највисоките ешалони на индексот на богатство, во кој доминираат американски технолошки претприемачи, пишува CNN.
Богатството на Адани од 146,9 милијарди долари, кое главно е поврзано со акциите на неговиот голем конгломерат Адани Груп, но сè уште е далеку зад 260 милијарди долари на Маск. Групата работи низа бизниси, вклучувајќи пристаништа и јаглен, кои напредуваа во последниве години.
Адани (60), кој инаку е најбогатиот човек во Азија, го напуштил колеџот за да си ја проба среќата во индустријата за дијаманти во Мумбај во раните 1980-ти пред да се сврти кон јаглен и пристаништа.
Неговиот конгломерат оттогаш се проширил на сè, од аеродроми до центри за податоци, цемент, медиуми и зелена енергија, фокусирајќи се на области кои премиерот Нарендра Моди ги смета за клучни за постигнување на долгорочните економски цели на Индија.
Најголемите пристанишни и аеродромски оператори во приватниот сектор во земјата, градскиот дистрибутер на гас и рудниците за јаглен се дел од империјата Адани, која исто така има за цел да стане најголемиот светски производител на обновлива енергија. Минатата година ветиле дека ќе инвестираат 70 милијарди долари во зелена енергија, потег што некои го критикуваа како „зелено перење“ со оглед на тоа што голем дел од приходите на групацијата сè уште доаѓаат од фосилните горива.
Брзото проширување на конгломератот Адани го поттикнал интересот на аналитичарите и ја зголеми веќе постоечката загриженост за нетранспарентните акционерски структури. Некои компании од Групацијата Адани тргувале со 700 пати поголема заработувачка, далеку надминувајќи ги Тесла и Амазон, чии вреднувања беа поблиску до 100 пати.
Адани наводно два пати бил во ситуација кога му била загрозена безбедноста. Тој преживеал киднапирање во 1997 година и терористички напад во 2008 година. Во 1997 година, тој бил држен под закана со оружје за откуп од 1,5 милиони долари пред да биде ослободен, според индиското издание Тајмс.
Милијардерот останал главно воздржан кога го прашале за инцидентот, но за „Фајненшл тајмс“ во 2013 година изјавил дека киднапирањето е еден од „двата или трите многу несреќни инциденти“ во неговиот живот.
Подоцна, Адани вечерал во ресторан во хотелот Таџ Махал Палас кога терористите го зазеле ресторанот како дел од пошироката серија терористички напади во Мумбаи во 2008 година. Тој избегал кога војниците упаднале во зградата.
Патем, подемот на Адани се совпаѓа со технолошката „распродажба“ што силно го погоди Безос од јануари, според Блумберг. Основачот на Амазон претходно беше на врвот на листата, но неговото богатство беше погодено по неговиот развод во 2019 година. Голем дел од неговото богатство е поврзано со акциите на Амазон, чии акции паѓаат, што го чинеше Безос 45 милијарди долари.
Од друга страна, акциите на Адани скокнаа за повеќе од 1.000 отсто од јуни 2020 година, како одраз на оптимизмот на инвеститорите за силата на неговиот конгломерат во области како што се инфраструктурата и обновливите извори на енергија.
