Игор Насковски: Како да станеш трагач на тартуфи и да заработуваш 5.700€ за 1кг! ↓↓↓
На вчерашната прес-конференција министерот за надворешни работи Бујар Османи соопшти дека се потребни уште минимум 50 нови вработувања за да се надополнат потребите во ресорното министерство.
Османи информира дека само оваа година се пензионираат 18 лица во МНР и додаде оти мора да се вработуваат нови лица.
На новинарско прашање за вработувањето на Бесмира Ејупи во МНР, Османи посочи дека во текот на оваа година од Министерството за политички систем и односи меѓу заедниците се преземени вкупно 13 соработници, вклучувајќи ја Ејупи. Дел од нив, како што рече, се во рамки на таа систематизација од К-5 Програмата, дел преку директна спогодба.
„Делумно е точна информацијата, преземена е од Министерството за политички систем и односи меѓу заедниците на позиција соработник во протокол, што е почетна позиција во МНР. Во моментов имаме огласи за 16 нови соработници, кој е во тек,“ рече Османи и додаде дека сите оние кои сакаат да работат во дипломатијата на почетни позиции имаат можност да аплицираат.
Османи нагласи дека е неточна информацијата оти Ејупи е советник зошто се потребни од 10 до 15 години во ресорното министерство, со многу положени испити и работно искуство за да преминете од помлад соработник во советник. Османи не гледа ништо спорно во овој процес.
На новинарско прашање дали ќе реферира за Ејупи пред собраниската Комисија за надворешни работи и оти тоа го побарал претседателот на оваа комисија Антонио Милошоски, Османи рече дека нема ништо спорно во ова вработување и оти тоа е направено во целосна законска процедура, како што се преземени и сите други, вкупно 16 преземања оваа година во МНР. Истакна дека МНР е отворено за сите државјани на земјава и тие може да аплицираат за работа, на некои позиции со средно, а на други со високо образование.
Османи посочи дека Ејупи не е ниту конзул, ниту кандидат за конзул, туку помлад соработник или на почетничка позиција во МНР.
На новинарско прашање дали на затворена седница на Влада, Сеад Садиковски, актуелен заменик директор на Агенцијата за стокови резерви е назначен за генерален конзул во Торонто, Османи рече „штом рековте затворена седница, тоа значи дека не можам да коментирам”. Додаде дека за амбасадори се бара агреман, а за конзули се бара егзекватура исто така од државата домаќин. Соопшти дека додека не се добие егзекватура за кандидатот, не може да се објави името бидејќи има ризик да се одбие, и итн. Тој не сакаше да ги коментира имињата и нивното образование и најави дека навреме граѓаните ќе бидат информирани.
Министерот Османи на прес-конференцијата во МНР рече дека има право со закон да има тројца специјални советници, а има само едно место пополнето, а другите се празни. Османи рече дека во МНР има вработени со договор онолку колку што дозволува Министерството за финансии.
