Александар Вучковски - сомелиер: Како македонските вина го освојуваат светот? ↓↓↓
Од први декември наместо 2, ако ја заборавите платнената и сакате да купите пластична кеса, тоа ќе ве чини 15 денари. Ова е само дел од пакетот законите кои вчера ги донесе Собранието, а кои имаат за цел користењето на пластика да го сведат на минимум.
Сепак, со законските решенија не е донесена обврска за маркетите да мора да даваат хартиени кеси или други алтернативи. Според информации на Сител, ова најверојатно ќе се регулира со правилник. За средствата од продадените пластични кеси, трговците ќе мора да водат евиденција по квартали, а надоместоците ќе треба да ги уплаќаат на посебна сметка на органот за животна средина.
– Со оваа законска регулатива ќе имаме практично целосен систем за третман и управување со оптадот. Што помала количина на отпад да завршува на депониите. Односно, производите коишто ги користиме да бидат подложни на реупотреба, преработка, рециклирање, и на крајот сосема мала количина којашто не може да се употребува, да се рециклира, да остане за депониите, вели Морачанин.
Од Иницијативата за забрана на пластични кеси велат дека законите се какво-такво подобрување. Сепак, за нив е несфатливо зошто се носи забрана за пакувања со пластика за една употреба само за рестораните во природно заштитените подрачја. Велат, ваквата пластика треба да се забрани секаде како што тоа летово го направи целата Европска унија.
Ваков амандман беше доставен до Собранието. Меѓутоа, пратениците не го прифатија бидејќи бизнисот бараше повеќе време за целосна забрана на пластиката за една употреба.
– Ова е веќе втора забрана, втора законска забрана за пластични кеси кај нас после онаа од 2012 година кога исто беа забранети. Меѓутоа со подзаконски акт спротивен на законот таа забрана беше анулирана, стана неважечка бидејќи во скоро сите сектори добија олеснување и продолжија да се користат пластичните кеси кај нас, вели Снежана Василевска од Иницијативата за забрана за пластични кеси.
И Морачанин и Василевска се согласни дека новата цена на пластичните кеси ќе ги одврати граѓаните од нивно купување. Ваквата мерка треба да ги натера граѓаните да користат платнени кеси и торби во маркетите.
Во 2019-та година производството на најлонски кеси во Македонија достигнало над 5.300 тони, бројка што е речиси повеќе од двојно повиска од 2008-та година.
