Игор Насковски: Како да станеш трагач на тартуфи и да заработуваш 5.700€ за 1кг! ↓↓↓
Роберт Доепген, швајцарски потомок на германски лекар, еден од неколкуте доктори кои се грижеле за здравјето на Адолф Хитлер, објавил детали од писмата на својот предок.
Писмата откриваат како оториноларингологот Карл Ото фон Ајкен го лекувал нацистичкиот диктатор поради проблеми со гласот, објави NZZ am Sonntag.
Весникот пишува дека Фон Ајкен го лекувал Хитлер неколку пати во период од десет години, почнувајќи од 1935 година. Писмата испратени до неговиот братучед од Фон Ајкен биле откриени од Роберт Доепген, правнук на докторот, кој ги нашол додека ги истражувал семејните документи за училишен проект. Фон Ајкен починал во 1960 година.
Британскиот историчар Ричард Џеј Еванс, експерт за германска историја, потврдил дека необјавените писма се автентични, пишува весникот.
Писмата укажуваат на огромниот страв на Хитлер од сериозна болест. „Ако нешто не е во ред, јас апсолутно мора да го знам тоа“, му рекол Хитлер на докторот по првата консултација во мај 1935 година, според едно од писмата.
Швајцарскиот весник наведува дека деталите од писмата укажуваат на важноста што Хитлер му ја придавал на сопствениот глас. Во едно писмо се наведува дека операцијата за отстранување на полип била одложена до говорот на Хитлер и дека Фон Ајкен го советувал нацистичкиот диктатор да го одмори гласот по процедурата.
Во своите писма, Фон Ајкен не негирал дека лекувал човек чии постапки резултирале со милиони брутално мачени и убиени луѓе во Втората светска војна, пишува швајцарскиот весник. По војната, еден германски лекар, на прашањето на руските истражители зошто не го убил Хитлер, одговорил: „Јас бев негов лекар, а не негов убиец“.
Хитлер се самоубил во бункер во Берлин во 1945 година, непосредно пред крајот на војната.
