“`html
Како несоницата влијае на имунитетот, расположението и целокупното здравје?
Не е случајност што сите водечки експерти за велнес и здравје постојано истакнуваат колку е квалитетниот сон клучен за нашето здравје и благосостојба. Една непреспиена ноќ можеби нема да остави сериозни последици, но долгорочното лишување од сон може значително да ни го наруши физичкото, менталното и емоционалното здравје.
„Добриот сон е неопходен за одржување на физичката и психичката рамнотежа,“ истакнува невропсихологот Д-р Санам Хафиз и додава: „Хроничниот недостаток на сон може сериозно да влијае на телото и умот, зголемувајќи го ризикот од различни здравствени проблеми.“
Во продолжение дознајте три клучни начини на кои недостигот на сон влијае на нашето тело и зошто е важно што побрзо да пронајдете решение.
1. ОСЛАБЕН ИМУНИТЕТ – ВАШАТА ПРВА ОДБРАНБЕНА ЛИНИЈА ПОПУШТА
Додека спиеме, нашето тело произведува специјални протеини и антитела кои се клучни за борба против инфекции, вируси и други болести.
„Недостатокот на сон може значително да ја намали продукцијата на овие заштитни клетки, со што се слабее имунолошкиот систем и се зголемува подложноста на настинки, грип и други инфекции,“ објаснува Д-р Шелби Харис, професор по неврологија и психијатрија.
Кога телото не се одмора доволно, имунолошкиот систем не функционира оптимално – не може навреме да ги препознае и елиминира патогените, што значи дека почесто се разболуваме и подолго ни треба за да се опоравиме.
Решение? Квалитетниот сон мора да биде приоритет – исто како што внимавањето на исхраната и физичката активност се важен дел од здравиот животен стил, така и сонот не смее да се занемари.
2. ЗГОЛЕМЕН РИЗИК ОД БОЛЕСТИ – КОГА ТЕЛОТО НЕ ДОБИВА ДОВОЛНО ОДМОР
Бидејќи недостигот на сон го слабее имунитетот, логично е дека тоа води и до поголема склоност кон сериозни заболувања.
„Додека спиеме, телото произведува цитокини – протеини кои помагаат во борбата против патогени микроорганизми и воспаленија,“ вели Д-р Хафиз. „Недостатокот на сон може да ја намали нивната продукција, со што организмот потешко се бори против инфекции и воспалителни процеси.“
Но, тоа не е сè! Хроничниот недостаток на сон исто така доведува до зголемено лачење на хормонот на стрес – кортизолот, кој дополнително го загрозува здравјето, зголемувајќи го ризикот од:
• Дијабетес
• Срцеви заболувања
• Зголемена телесна тежина
Решение? Организирање на редовен распоред за спиење, намалување на стресот и избегнување на екрани пред легнување може значително да го подобри квалитетот на спиењето и да ги редуцира долгорочните здравствени ризици.
3. НЕГАТИВНО ВЛИЈАНИЕ ВРЗ РАСПОЛОЖЕНИЕТО И МЕНТАЛНОТО ЗДРАВЈЕ
Сигурно сте забележале дека по една непреспиена ноќ сте пораздразливи, заморени и воопшто нерасположени. Тоа не е случајност – сонот игра клучна улога во регулацијата на емоциите и стресот.
„Лошиот сон може да ја намали способноста за контрола на емоциите и расположението,“ вели Д-р Харис. „Луѓето кои хронично не добиваат доволно сон често се соочуваат со зголемена анксиозност, депресија и стрес, што може негативно да се одрази на работата, училиштето и односите со другите.“
Овие состојби не се само моментални – ако несоницата стане хронична, може сериозно да го наруши целокупниот квалитет на живот.
Решение? Физичка активност пред спиење, медитација и техники за релаксација може да помогнат во подобрување на квалитетот на сонот и стабилизирање на расположението.
СОНОТ НЕ Е ЛУКСУЗ, ТУКУ ПОТРЕБА
Во светот кој постојано бара продуктивност и брзина, квалитетниот сон често е жртва на пренатрупаните дневни распореди. Но, доколку не одделиме доволно време за одмор, долгорочно ќе ја платиме цената – не само со заморот, туку и со сериозни здравствени проблеми.
Порака? Спиењето не е губење време – тоа е најдобрата инвестиција во вашето здравје и долговечност.
“`
