Игор Насковски: Како да станеш трагач на тартуфи и да заработуваш 5.700€ за 1кг! ↓↓↓
Меѓу големите и светски познати масовни настани кои беа откажани поради Covid-19 вирусот е и познатиот Саем на автомобили во Женева кој со годинешното одржување требаше да одбележи 90-годишнина од неговото постоење.
Саемот требаше да се одржи на 3 и 4 март за новинарите и потоа од 5 до 15 март за пошироката јавност, но е одложен како дел од мерките на претпазливост по јавното здравје воведени ширум Швајцарија, кои подразбираат откажување на сите настани со повеќе од 1.000 луѓе.
Откажувањето ќе го чини градот Женева меѓу 200 и 260 милиони евра, а лошо ќе се одрази и на сите пријавени учесници кои во „5 до 12“ треба да прават измени и да калкулираат како најдобро да постапат за да претрпат што е можно помала штета, а сепак да ги претстават своите новитети.
Сега светските производители на автомобили треба да најдат алетрнативни платформи и методи за да ги претстават нивните најнови сериски модели, прототип модели, како и истражувања.
Некои од нив веќе се подготвени за овој предизвик: Porsche вчера официјално ја најави премиерата на својот нов 911 Turbo S за утре, 3 март (истиот датум кога требаше да дебитира во Женева), ама онлајн.
Со оглед на тоа дека во поголемиот број европски земји се забранети поголеми собири, Porsche премиерата ќе ја одржи преку стрим во живо, што значи дека буквално секој ќе има можност да ја следи „од првиот ред“.
BMW исто така утре требаше да ја прослави светската премиера на Concept i4 во Женева: целосно нов електричен Gran Coupé кој следната година ќе се симне од монтажната лента во Минхен и ќе се натпреварува со адутите на Tesla. Сега шефот на BMW Оливер Зипсе сака да го покаже возилото на дигиталната конференција за новинари од истражувачкиот центар на BMW во Минхен, а настанот исто така ќе се стримува во живо.
Audi планираше светска премиера на A3 Sportback во Женева и сакаше да претстави две нови верзии на големиот, целосно електричен e-tron модел: e-tron S и e-tron S Sportback. Сега сѐ ќе се одвива во Инголштат. Audi за утре, 3 март, закажа интернет светска премиера за купувачите и автомобилските медиуми во медиумскиот центар на компанијата и преку профилите на Audi на социјалните медиуми.
Mercedes-Benz соопшти: „Нашата прес-конференција што беше планирано да се одржи во вторник во Женева ќе се одржи во електронски формат. Се радуваме на мноштвото виртуелни соработници.“ Mercedes сака да ја покаже обновената E-класа и новите плаг-ин хибридни модели од класата компактни возила. Датумот на премиерата уште не е дефиниран.
Ferrari не планира да организира алтернативен настан на класичната саемска презентација, а ни Fiat Chrysler нема „план Б“, но сепак разммислува како да го покаже новиот електричен Fiat 500. Во моментов уште не е познато какви се плановите за претставување на освежените модели Alfa Romeo, Giulia и Stelvio.
Volkswagen ќе ги прикаже своите новитети утре преку стриминг во живо. Ралф Брандштатер, главниот извршен директор на брендот Volkswagen, и д-р Франк Велш, член на управниот одбор на брендот Volkswagen кој ќе биде одговорен за техничкиот развој, ќе ги претстават новиот Touareg R со хибридна технологија и осмата генерација Golf GTI. Настанот ќе се стримува во живо на ОВОЈ ЛИНК.
Renault денеска го откри концептот MORPHOZ. Францускиот бренд DS, кој е дел од групацијата PSA, бара место во близина на Париз за да го претстави концептот DS 9.
