Во златната ера на холивудската телевизија, на сетот на култната серија „Пријатели“, се роди една необична романса – нежна, романтична и истовремено болно минлива.
Џулија Робертс, тогаш веќе една од најсјајните ѕвезди на филмското платно, и Метју Пери, духовитиот Чендлер Бинг, ја започнаа својата љубовна приказна на најневообичаен начин – преку факс пораки.
Нивното запознавање се случи средината на деведесеттите, кога Робертс, на врвот на својата слава, прифати да се појави како гостинка во една епизода од „Пријатели“ – но под еден услов: нејзиниот лик да биде поврзан токму со Чендлер Бинг. Пери, маѓепсан од таа можност, и испрати три букети црвени рози и духовита порака. Условот што таа го постави беше да ѝ ја објасни квантната физика – и тој тоа го направи, со шарм и сериозност на заљубено момче со генијален ум. Наскоро, нивната комуникација преку факс стана страст од ден на ден – разменија стотици пораки пред воопшто да се сретнат во живо.
Во време без социјални мрежи и инстант пораки, нивните писма беа љубовни исповеди во продолженија. Робертс поставувала прашања од типот: „Зошто да излезам со тебе?“, а целиот тим сценаристи му помагал на Пери да состави совршени одговори.
Нивната прва средба беше исполнета со хемија што просто се чувствуваше во воздухот – слично како и во култната епизода „The One After the Superbowl“ од 1996 година, која и ден-денес останува најгледаната епизода на „Пријатели“ со речиси 53 милиони гледачи. Во неа, Робертс ја играше Сузи Мос, поранешна школска другарка на Чендлер, која се враќа – но со план за одмазда. Иронично, додека ликот ѝ беше одмазда од минатото, реалноста беше полна со нежност и разиграна блискост.
Во тоа време, тие веќе беа во врска. Сепак, и покрај бајковитиот почеток, љубовта траеше само шест месеци. Во својата автобиографија „Friends, Lovers and the Big Terrible Thing“, објавена во 2022 година, Пери искрено призна дека токму неговата длабока несигурност ја уништила оваа романса.
„Постојано бев уверен дека ќе ме остави,“ напиша тој. „Не можев да ја издржам таа болка, па се повлеков прв.“ Рече дека верувал оти Робертс прави компромис со себе што е воопшто со него – нарекувајќи се себеси „скршен и недостоен за љубов“. На крајот, самиот ја прекинал врската со убава и сјајна Џулија, само за да не мора да се соочи со нејзино евентуално заминување.
Пери, роден во Вилијамстаун во 1969 година, имал тешко детство – развод на родителите, чувство на осаменост, рано започнување со алкохол. Неговата кариера започна со серии како „Growing Pains“ и „Charles in Charge“, но пресвртот дојде во 1994 година кога стана дел од екипата на „Пријатели“. За Чендлер не мораше да се труди – тој не го глумеше Чендлер, тој беше Чендлер.
И покрај светската слава, внатрешните рани не заздравеа. Неговата борба со зависности – од алкохол и од опијати – го следеше и за време на најславните години. За време на снимање на серијата, најмалата шала што не би предизвикала смеа од публиката ќе го натераше да се испоти и паничи.
Пери во 2018 година се соочи со сериозни здравствени проблеми – перфорација на дебело црево предизвикана од злоупотреба на лекови го доведе до раб на смртта, со само 2% шанси за преживување. Две недели беше во кома.
По неговата ненадејна смрт на 28 октомври 2023 година – што во еден морничав пресврт на судбината се случи токму на роденденот на Џулија Робертс – светот се збогуваше со човекот кој на генерации им носеше насмевка. Робертс тогаш изјави: „Ненадејната смрт на некој толку млад е срцепарателна. Сите нè потсетува да го цениме она што го имаме и да продолжиме напред – најдобро што знаеме.“
Нејзините зборови беа полни со топлина и тивка тага. Нивната романса можеби беше кратка, но остави длабок траг – како љубовно писмо што никогаш не е завршено, факс што никогаш не е до крај испишан…
