Министерот за внатрешни работи, Оливер Спасовски, најави дека 14 лица од последниот протест за случајот „Монструм“ ќе добијат кривични пријави. Тој истакна дека за 14 лица ќе има кривични, поради тоа што уништувале државен имот, приватни објекти и возила на полицијата, како и за напади на службени лица.
„Демократско право е протестот, но непочитувањето на законските прописи мора да бидат санкционирани. Во единицата за насилен криминал беа идентификувани и вчера повикани 14 лица на разговор, и ќе им бидат поднесени пријави“, рече Спасовски.
Еден од повиканите било малолетно лице, кое било придружувано од родители.
На протестот за „Монструм“ учествуваа неколку стотици лица, кои бараа ослободување на обвинетите, кои според нив, не се виновни за случајот. Протестот беше организиран откако Обвинителството побара доживотен затвор за дел од обвинитетите за петкратното убиство кај Смилковско езеро.
