Александар Вучковски - сомелиер: Како македонските вина го освојуваат светот? ↓↓↓
По вчерашната седница на ЦК на опозициската ВМРО ДПМНЕ, потпретседателот на партијата, Александар Николовски на јавноста и соопшти дека од редовите на партијата донесена е одлука да се исклучат Митко Јанчев, актуелен градоначалник на општина Кавадарци, како и Сашо Мијалков, понарешниот директор на УБК.
По тој повод, на социјалните мрежи, се огласи и Јанчев кој воедно побара јавно извинување од лидерот на партијата, Христијан Мицкоски, и Александар Николовски, а во спротивно доколку не го почитуваат неговото барање, до нив ќе биде поднесена тужба, посочи.
Во целост ви ја пренесуваме неговата порака упатена на социјалната мрежа, фејсбук.
Почитувани,
На вчерашната прес-конференција на ВМРО-ДПМНЕ до мене беа упатени неосновани обвинувања. Обвинувањата беа насочени кон мене како потпретседател на ВМРО-ДПМНЕ но и лично како индивидуа.
Претседателот на ВМРО-ДПМНЕ г-дин Христијан Мицковски на вчерашниот ЦК даде предлог за мое разрешување од функцијата потпретседател. Како лидер на најголемата политичка партија во Република Македонија му доликува разрешувањето од функцијата потпретседател да го води крајно професионално па дури и да упати благодарност до мене за моите досегашни вложувања во партијата, но уште поважно да ја почитува функцијата Градоначалник на Општина Кавадарци од редовите на ВМРО – ДПМНЕ која од досега сработеното носи само успех најмногу за Општина Кавадарци но и за ВМРО-ДПМНЕ.
Напротив на вчерашната прес-конференција од г-дин Александар Николовски кон мене беа упатени ниски и агресивни обвинувања за закани, поткуп и криминал, рамо до рамо со Сашо Мијалков.
Поради ваквите неосновани и крајно непрофесионални навреди од страна на Христијан Мицковски и Александар Николовски кои се обидуваат да го нарушат мојот авторитет, барам јавно извинување и од г-дин Христијан Мицковски и од г-дин Александар Николовски. Во спротивно кон нив двајцата ќе поднесам приватни тужби за клевета и навреда на мојата личност.
Различниот став и различното размислување во една нормална модерна партија треба да бидат прифатени, дискутирани и потоа заеднички да се најде вистинскиот пат, но тоа не е случај и со ВМРО-ДПМНЕ. Моето залагање за партијата ќе продолжи со сите мои способности и целосна професионална посветеност. Различните ставови во една партија и почитувањето на истите можат само да водат кон прогрес и плодна почва за развивање на дискусии и создавање на темели за партија која ќе се движи кон посветла иднина.
Мојата почит кон членовите на ВМРО-ДПМНЕ е голема и ќе продолжам гордо како Градоначалник на Општина Кавадарци од редовите на ВМРО-ДПМНЕ да дејствувам во интерес на граѓаните.
Со почит,
Градоначалник
М-р Митко Јанчев
