Александар Вучковски - сомелиер: Како македонските вина го освојуваат светот? ↓↓↓
Денеска во Скопје пристигна првиот дел од италијанската донација од 250.380 вакцини на компанијата „Фајзер“ (втората пратка пристигнува в среда, 9 февруари).
Ова е најголемата донација досега направена од една земја за Македонија, како што најави министерката за внатрешни работи на Италија, Лучана Ламорџезе, при нејзината посета на земјава при крајот на минатата година. Донацијата од Министерство за надворешни работи на Италија беше реализирана преку механизмот „Ковакс“ (спроведена од страна на УНИЦЕФ во соработка со „Гави“, „Ваксин алијанс“ и СЗО).
„Оваа донација е дел од еден општ италијански план за поддршка како во улога на земја членка на ЕУ така и во билатерален контекст, а чија цел е да се поттикне вакцинацијата на глобално ниво. Во 2021 година Италија издвои 385 милиони евра за системот ‘Ковакс’ и 45 милиони дози вакцини наменети за други земји. Преку оваа донација сакаме да ѝ дадеме конкретна поддршка на Македонија во борбата против пандемијата на Ковид-19“, изјави амбасадорот Силвестри и додаде: „Важно е сега да се интензивира кампањата за вакцинација за да се обезбеди поголема заштита на населението“.
На овој апел се придружи и министерот за здравство, Беким Сали, кој срдечно се заблагодари за донацијата и за континуираната поддршка што Италија ѝ ја дава на Македонија.
Денешната донација е во согласност со традиционалната италијанска поддршка за Македонија, вклучително и во здравствениот сектор. Имено, во тек е последната фаза од Програмата за рационализација и модернизација на биомедицинската технологија во здравствениот сектор во Република Македонија, што се реализира со помош на мекиот заем што Италија ѝ го додели на Македонија со цел набавка на современи машини во здравствениот сектор, во вкупна вредност од над два и пол милиона евра.
