Диск голф го освојува светот, а го нема во Македонија!? ↓↓↓
Директорот на Комерцијална банка, Хари Костов, кој меѓу другите, бил цел на масовното прислушување во периодот од 2008 до 2015 година, денес сведочеше во својство на оштетен на судското рочиште поврзано со овој случај во Основниот кривичен суд во Скопје, пренесува 360 Степени.
Костов рече дека му биле прислушувани два телефонски броја и бил меѓу најприслушуваните луѓе надвор од политиката.
Прислушувањето, рече, можеби не му нанело штета нему лично, но можеби им нанело на фирмите клиенти на банката. Тој објаснуваше дека, на пример, кога бил надвор од земјава, другите директори во банката му се јавувале на телефон за да прашаат дали да дадат гаранција на одредена фирма која сака да учествува на некој тендер.
Тоа што некој ги слушал ваквите разговори, можело да им нанесе штета на фирмите.
„Надлежните директори во банката ме барале да ме прашаат дали одобруваме некоја зделка, односно од мене барале согласност за издавање гаранција на некои фирми за учество на тендери за јавни набавки. На пример, кога една градежна компанија се јавува на повик за лицитација и кога од нас побарала гаранција, мене директорите ќе ме прашаат дали може да извадиме гаранција, да речеме, од 30 милиони денари. Со оглед дека гаранцијата претставува десет отсто од учеството ја јавната набавка, тогаш тој што ги прислушувал разговорите можел да ги даде податоците на други фирми конкуренти и со тоа да им нанесе штета на фирмите“, сведочеше Костов.
Тој наведе и конкретен пример со вакво сомнение, па рече оти од некоја градежна компанија имале информација дека конкурентска фирма ги победила на лицитација за нецели 1 000 денари.
Костов рече дека ако во случајот „Таргет-Тврдина“ се утврди дека отштета треба да плаќа државата, нема да бара, но ќе побара ако тоа бидат налогодавците.
Сведочеше и ексразузнавачот Слободан Богоевски, кој рече дека кон средината на 2008 година од вработени во УБК бил предупреден дека неговите комуникации се следат, а во исто време времено се организирало и физичко следење.
На почеток, рече, не го сфаќав тоа сериозно бидејќи сум работел во таа служба долги години и навикнати сме на такви околности.
„Но, како изминуваше времето се повеќе добивав такви информации од вработени и раководни лица во УБК, ми велеа да внимавам што зборувам, со кого се среќавам“, рече Богоевски.
Тој рече дека има докази дека во 2009 на незаконит начин биле барани ПИ-мерки за него и дека обвинетиот Сашо Мијалков се среќавал со судии и обвинители.
Рече дека го „прилепувале“ кон разни случаи само за да траат ПИ-мерките бесконечно. Благодарение на незаконското прислушување, рече тој, се засновале случаи и обвиненија врз него.
Најголемиот дел од сведоците што се повикани за денеска на предлог на обвинителството се лица чии телефонски броеви биле прислушувани во периодот од 2008 до 2015 година. Меѓу најавените сведоци има новинари, адвокати, истакнати личности од општествено-политичкиот живот и други. Мери Јордановска, Зоре Темелковски, Владимир Пивоваров, Трајче Арсов, Звонко Давидовиќ, Хари Костов… се имињата кои на минатото рочиште беа споменати меѓу оние што денеска треба да сведочат.
