„Четворица дневно умираат чекајќи чист воздух“ и „Ставете налепници на тешката индустрија“, се само некои од транспарентите што може да се видат на денешниот мирен протест во Скопје поради загадувањето.
Протестот го организира иницијативата „Канцерогено општество“, а почна околу 13 часот пред Собранието на РМ. По околу 40 минути граѓаните се упатија кон Владата каде ги искажаа своите барања.
-Владата и институциите да престанат со т.н. решенија против загадениот воздух кои дирекно удираат по џебот на најсиромашните, а крупните капиталисти и најголемите загадувачи остануваат недопрени, порачаа активистите.
Воедно побараа свикување итна владина седница поради алармантната состојба со квалитетот на воздухот и вклучување експерти за решавање на проблемот.
Како што рече Кристијан Узунов од иницијативата „Канцерогено општество“, еден од најголемите причинители за рана смрт е дишење неквалитетен воздух, а јавни дебати околу квалитетот на воздухот во Македонија скоро и нема.
-Бараме Владата да ги употреби сите средства за справување со овој проблем и претставници од граѓанскиот сектор да се вклучат во надлежните контроли за големите загадувачи, истакна Узунов и додаде дека никој не смее да си игра со нашето здравје.
Според Давор Врговиќ, исто така активист во „Канцерогено општество“, барањата на граѓаните треба да се надополнат и подобрат од страна на експерти.
-Очекуваме некој од Владата да не прими и да не сослуша. Останува да видиме како ќе одговорат на нашите барања. Потоа, дополнително ќе утврдиме како би дејствувале понатаму, изјави Врговиќ за МИА.
Протестот беше закажан и на социјалните мрежи под слоганот „Мртво општество, не!!!“.
Извор: Нова Македонија
