Актуелно

„Фрауенкирхе – фото приказна“ – изложба на фотографската легенда Александар Кондев во Мала Станица

Под наслов „Фрауенкирхе – фото приказна“ вечерва, со почеток во 20 часот, во Националната галерија на Македонија – „Мала станица“, ќе биде отворена изложбата на фотографии од еден од најреномираните македонски фотографи и своевидна фотографска легенда на урбаната фотографија, Александар Кондев.

Фото приказната за катедралата Фрауенкирхе во Дрезден Александар Кондев ја започнува во 1998 година и таа траеше цели дваесет години – до јуни 2018 година. Во тој временски распон Кондев во повеќе наврати го фотографира „враќањето во живот“ на оваа катедрала, инаку речиси целосно уништена од сојузничките бомбардирања во последните месеци на Втората светска војна. Овој проект на Кондев, според неговиот карактер претставува предизвик на неколку рамништа, меѓу кои два се во самиот фокус: реконструкцијата на катедралата Frauenkirche и фото-приказната на уметникот за тој процес. Секако, на обете рамништа доаѓа до израз потенцирањето на (денес заборавената) документаристичката моќ на фотографијата, но и нејзината „употреба“ во современ творечки контекст.

Оттука оваа изложба ги поврзува, ги „документира“ двата процеси истовремено: текот на реконструкцијата на катедралната црква и субјективната интерпретација на тој процес како самостоен, авторски „проект во процес“ на Александар Кондев. Целосно соживеан со овие процеси фотографскиот апарат на Кондев селектира – од широки („информативни“) планови, преку себедоволни архитектонски детали и конструкции, до она без што еден религиозен објект не би бил тоа што е’: луѓето во него.

Куратор на проектот е виш кустос, Златко Теодосиевски и истиот ќе биде достапен за публиката и широката јавност до 11 јуни 2019 година.

Advertisements
To Top