Џинс обувки – трендот што го обележува пролетта
Џинсот е вечна класика, но оваа пролет го напушта рамките на фармерки и јакни и сосема буквално – стапнува на прво место!
Џинс обувките стануваат моден израз број еден, носејќи доза носталгија, младешка ведрина и лежерна елеганција со секој чекор.
Од сандали и еспадрили, преку патики и мокасинки, па сè до чизми инспирирани од духот на раните 2000-ти – обувките од џинс се наоѓаат на модните писти, Инстаграм профилите и излозите на популарните улични брендови. Моделите како оние на „Дизел“, „Баленсијага“ и „МСГМ“ го наметнаа овој тренд и на улиците, освојувајќи го срцето на љубителките на модата ширум светот.
Особено популарни се моделите од изветвен светол џинс, надополнети со реси, везени детали или комбинации со кожа и платно. Платформите од џинс нè враќаат во ерата на Y2K, додека балетанките и салонките од џинс се совршен спој на елеганција и дневна урбана естетика.
За поопуштени комбинации, патиките со винтиџ призвук од џинс одлично одат со оверсиз сако и шорц, додека чизмите до колена совршено се вклопуваат со бохо фустани и воздушести здолништа. А за оние што сакаат да направат впечаток – комбинирајте џинс обувки со други џинс парчиња – бидејќи, да, комбинацијата џинс на џинс повторно е во мода и никогаш не изгледала повпечатливо.
Брендовите од типот на „Зара“, „Пул енд Беар“, „Бершка“ и „Страдивариус“ веќе ги претставија своите интерпретации на овој тренд, нудејќи богат избор на модели кои одлично го соединуваат комфорот, практичноста и стилот.
Ако уживате во игра со детали и текстури, но притоа не сакате да изгубите од чувството на леснотија и урбана лежерност – обувките од џинс се трендот што мора да го пробате оваа пролет. Зашто џинсот никогаш не излегува од мода – само ја менува својата форма.
