ЕМОТИВНОТО ТАНЦУВАЊЕ НА ДЕМИ МУР И БРУС ВИЛИС ВО КУЈНАТА: ТРОГАТЕЛНО ВИДЕО ЗА 70. РОДЕНДЕН НА ЛЕГЕНДАРНИОТ АКТЕР
Брус Вилис, култниот холивудски актер и ѕвезда на бројни блокбастери, на 19 март 2025 година наполни 70 години.
Откако се повлече од глумата во 2022 година, кога му беше дијагностицирана афазија која подоцна премина во фронтотемпорална деменција, Брус се повлече од филмската сцена и сега времето го минува опкружен со љубовта на семејството и најблиските пријатели.
Од моментот кога беше објавена неговата дијагноза, неговата сопруга Ема Хеминг Вилис, заедно со неговите постари ќерки од бракот со Деми Мур, редовно споделуваат вести за неговата здравствена состојба, како и трогателни моменти од неговото секојдневие. По повод неговиот 70. роденден, ќерката Румер Вилис објави видео кое ги разнежни обожавателите низ целиот свет. На видеото, Брус танцува со поранешната сопруга Деми Мур во семејната кујна, при што атмосферата зрачи со топлина и нежност.
„За кралот. Те сакам, тато. Среќен 70. роденден, тато“, напиша Румер покрај видеото кое предизвика лавина емоции кај обожавателите на оваа легенда од акционите филмови.
ПРВО ЈАВНО ПОЈАВУВАЊЕ ПО ДИЈАГНОЗАТА
Пред неколку месеци, во јануари 2025 година, Брус Вилис имаше свое прво јавно појавување по објавата на неговата здравствена состојба. Неговата сопруга, Ема Хеминг Вилис, го сними моментот со камера и сподели црно-бел клип на кој Брус срдачно се поздравува со полицаец од Лос Анџелес и позира со него за заедничка фотографија. Тој емотивен момент се случи при посетата на Вилис на службите кои беа на првата линија во справување со катастрофалниот пожар во Лос Анџелес.
Ема Хеминг и Брус Вилис се во брак од 2009 година и заедно имаат две ќерки — Мејбел Реј Вилис (12) и Евелин Пен Вилис (10). Освен нив, Брус има и три ќерки од првиот брак со Деми Мур — Румер, Скаут и Талула Вилис. Иако Деми и Брус се разведоа во 2000 година, нивната поврзаност остана силна, а пријателскиот однос трае и денес, нешто што е очигледно во секој заеднички момент што го споделуваат со нивните деца.
СИЛАТА НА СЕМЕЈСТВОТО И ПРИФАЌАЊЕТО НА БОЛЕСТА
Деми Мур, во октомври 2024 година, на еден филмски фестивал отворено зборуваше за болеста на својот поранешен сопруг. „Болеста е таква каква што е. Верувам дека е потребно длабоко прифаќање на тоа што се случува. Во дадените околности, Брус е стабилен. Ги охрабрувам сите да се прилагодат на сегашната состојба, наместо да се држат за минатото. Кога ќе се појавиш и ќе го видиш тоа што е сега, во тоа се крие голема убавина и нежност“, рече Деми искрено и храбро.
Видеото во кое Деми и Брус танцуваат во кујната токму го потврдува тоа — момент на чиста емоција и љубов, кој покажува дека, и покрај сите предизвици, семејството останува најголема поддршка и извор на радост.
