“`html
Модната куќа Версаче започнува ново поглавје по заминувањето на Донатела Версаче од позицијата креативен директор, со што завршува нејзината блескава ера што траеше скоро три децении.
По завршувањето на Модната недела во Париз, групацијата Capri Holdings Limited, која го контролира овој италијански бренд, објави дека Донатела ќе преземе нова улога – Chief Brand Ambassador, односно амбасадор на брендот, посветена на хуманитарни иницијативи и проекти во духот на долгогодишната традиција на Версаче. На чело на креативниот тим доаѓа Дарио Витале.
Донатела Версаче преку Инстаграм им се обрати на своите следбеници, потврдувајќи ја промената на врвот на брендот:
„Поддржувањето на новите генерации дизајнери отсекогаш ми било важно. Воодушевена сум што Дарио Витале ќе ни се придружи и со нетрпение ја очекувам новата перспектива на Версаче. Им благодарам на мојот неверојатен дизајнерски тим и на сите што работат со Версаче, со кои имав привилегија да соработувам повеќе од три децении. Ова беше најголемото признание во мојот живот – да го продолжам наследството на мојот брат Џани. Тој беше вистински моден гениј, но се надевам дека успеав да пренесам барем дел од неговиот дух и упорност. Во мојата нова улога како Chief Brand Ambassador, ќе останам најстрастниот поддржувач на брендот. Версаче е во мојата ДНК и засекогаш во моето срце.”
НОВ КРЕАТИВЕН ПРАВЕЦ: ДАРИО ВИТАЛЕ
Дарио Витале, поранешен директор за дизајн и имиџ на брендот Miu Miu, сега ја презема водечката креативна улога во Версаче, откако ја напушти својата позиција во Прада групацијата во јануари. Неговото назначување доаѓа во момент кога се шпекулира за можната аквизиција на Версаче од страна на Прада, што дополнително го разгорува интересот во модниот свет. Витале ќе ја преземе новата функција на почетокот од април, носејќи со себе препознатлив естетски потпис и креативна храброст, која Miu Miu ја претвори во една од најуспешните модни приказни во последните години.
Под негово водство, Miu Miu забележа импресивен раст на малопродажните приходи од 84% во текот на последниот квартал, значително надминувајќи го поширокиот луксузен сектор. Овој успех сведочи за неговата способност да го реинтерпретира брендот со иновативен пристап и имајќи префинето чувство за стил – нешто што сега се очекува да го донесе и во Версаче.
„Витале е редок талент и визионер кој длабоко ги почитува суштината и вредностите на Версаче и има јасна визија за неговиот понатамошен развој”, изјави генералниот директор на Версаче, Емануел Жинцбургер.
„Уверени сме дека неговото искуство и визија ќе донесат свежа перспектива и дополнително ќе го издигнат брендот на глобалната модна сцена.”
ШПЕКУЛАЦИИ ЗА ПРЕЗЕМАЊЕ: ПРАДА И ВЕРСАЧЕ
Модниот свет го следи со возбуда можниот договор за преземање на Версаче од страна на Прада. Откако Capri Holdings Limited го купи брендот во 2018 година за 1,8 милијарди евра, целта беше да се изгради моден гигант вреден 2 милијарди долари. Сепак, минатата година продажбата на Версаче стагнираше, додека Miu Miu – под водството на Витале – бележеше значителен раст и стекнување на сè поголема популарност во светот на високата мода. Оживувањето на Версаче бара огромни инвестиции, стратешко планирање и краткорочни жртви, но потенцијално може да донесе престиж и долгорочен успех.
Останува да се види како ќе се развива оваа модна приказна и дали Витале ќе внесе нов дух во Версаче, зачувувајќи ја неговата препознатлива смелост и гламур кои го направија брендот симбол на италијанскиот луксуз. Иако Донатела повеќе не е на чело на дизајнерскиот тим, таа останува вечна икона на брендот и негов најголем амбасадор, симболизирајќи ја нераскинливата страст кон модата и непрекинатиот дух на семејното наследство.
“`
