Диск голф го освојува светот, а го нема во Македонија!? ↓↓↓
Ново, второ по ред федерално обвинение беше поднесено против 77-годишниот поранешен претседател на САД, Доналд Трамп, од страна на специјалниот обвинител Џек Смит. Ова обвинение е дел од истрагата за напорите на Трамп да ги поништи резултатите од претседателските избори во 2020 година, кои доведоа до упадот на Капитол на 6 јануари 2021 година.
Обвинението на 45 страници се состои од четири точки, во кои Трамп е обвинет за заговор за измама, заговор за попречување на службената постапка (пренос на власта), попречување и обид за попречување на службената постапка, како и за повреда на правата гарантирани со законите и Устав на САД. Во обвинението се додава дека Трамп имал и шест соучесници, но нивните имиња не се споменуваат, пренесува Плус Инфо.
„Нападот врз главниот град на нашата нација на 6 јануари 2021 година беше напад без преседан врз седиштето на американската демократија. Како што е опишано во обвинението, нападот е мотивиран од лаги“, рече специјалниот државен обвинител, пренесуваат агенциите.
Доколку поранешниот американски претседател биде прогласен за виновен за барем една од четирите точки од обвинението, му се заканува неколкугодишна затворска казна. Трамп, кој денеска беше повикан да се појави пред федералниот судски суд во Вашингтон, ги негира обвинувањата и целиот случај на социјалните мрежи го нарече „смешен“.
Првото обвинение против Трамп беше покренато како дел од истрагата за доверливи документи кои поранешниот претседател ги изнесе од Белата куќа, а пред тоа големата порота на Менхетен го обвини Трамп за деловна измама. Трамп, кој ќе се обиде да му се одмазди на Бајден на претседателските избори во 2024 година, се изјасни за невин и во двата случаи.
Обвинителството го обвинува Трамп дека „ширел лаги“ за наводна измама на гласачите на изборите во 2020 година, поттикнувајќи упад во зградата на Конгресот, што доведе до немири во кои загинаа пет лица и еден полицаец, јавува Би-Би-Си.
Сè уште не е јасно кога би можело да започне судскиот процес, иако специјалната обвинителка бара брз почеток на процесот.
Новото обвинение не го спречува Трамп да продолжи со кампањата. Какви политички последици ќе има ова останува да видиме. Според соопштението од штабот на Трамп, новото обвинение е „патетичен обид на криминалното семејство Бајден“ и нивното Министерство за правда да се мешаат во претседателските избори во 2024 година.
Незаконскиот прогон на претседателот Трамп и неговите поддржувачи потсетува на нацистичка Германија во 1930-тите, поранешниот Советски Сојуз и другите авторитарни, диктаторски режими“, соопшти штабот.
Експертите блиски до Демократската партија го поздравија обвинението како победа на владеењето на правото што може да помогне во зајакнувањето на американскиот изборен систем наспроти тековните закани од Трамп и неговите сојузници.
Републиканските политичари различно реагираа на новото обвинение против Трамп, во кое се тврди дека тој се обидел со измама да ги оспори резултатите од изборите.
Претседателот на Претставничкиот дом, Кевин Мекарти, претходно на социјалната мрежа „Х“ (поранешен „Твитер“) го оцени обвинението како политички обид да се оттргне вниманието од истрагите за бизнисот на синот на претседателот Џозеф Бајден Хантер.
Поранешниот потпретседател Мајк Пенс, кој се кандидира за номинација, го обвини Трамп дека вршел притисок врз него да помогне да се поништат резултатите од изборите во 2020 година: „Ова обвинение служи како важен потсетник: секој што се става над Уставот никогаш не треба да биде претседател на САД. Нашата земја е поважна од еден човек. Нашиот устав е поважен од кариерата на кој било човек“, рече Пенс во изјавата.
