Advertisements
Актуелно

ДИК: За членство во ЕУ ќе мора да има уште еден, ОБВРЗУВАЧКИ референдум

На прес-конференцијата која вчера членовите на ДИК ја одржаа за медиумите, меѓу другите прашања кои ги добија и на кои одговараа, беше и она дали има разлика во исполнувањето на условите на консултативен или обврзувачки референдум, од ДИК одговорија дека има разлика и дека тоа зависи за што се распишува.

За задолжителен, обврзувачки референдум потребно е апсолутно мнозинство, односно 50 отсто плус 1 од гласачите треба да се „за“. Според Уставот тоа е во случај на менување граница, стапување во сојуз со други држави, за конфедерација.

Од ДИК велат дека кога ќе завршат преговорите за членство во ЕУ, во Македонија ќе треба да се распише уште еден референдум за членство во унијата и тој мора да е задолжителен. За членство во НАТО Македонија веќе донесе одлука во Собранието во 1993 година.

Вчера ДИК информираа дека на 30 септември или на 1 октомври тие само ќе ги соопштат резултатите од технички аспект, но нема да даваат оценка дали референдумот ќе биде успешен или не.

Од ова произлегува дека за консултативниот референдум распишан за 30 септември правилото 50%+1 глас не важи, односно ДИК по пребројување на гласовите не може да прогласи дали изјаснувањето на граѓаните успеало или не и дека таа задача очигледно ќе остане на политичарите.

А во тој случај се отвора голем простор за тоа што може да биде успешен, а што неуспешен. Односно дали е успешен ако има цензус без разлика на тоа кој за што гласал, или пак успешен е и ако нема цензус, ама повеќе гласови има „за“.

Во тој случај, кога консултацијата со народото ќе се прогласи за успешна (без цензус), владини претставници веќе најавија дека тоа значи дека претставниците на народот, Собранието и Владата, ќе мора да ја донесат конечната одлука. А за тоа, за уставните измени како еден од условите на Спогодбата со Грција, потребно е двотретинско мнозинство во Собранието.

Извор: Мкд.мк

Advertisements

Најпопуларно

To Top