Александар Вучковски - сомелиер: Како македонските вина го освојуваат светот? ↓↓↓
Петтата трансплантација на срце заедно со двете трансплантации на бубрези од починат донор денеска беа успешно извршени во комплексот клиники „Мајка Тереза“ во Скопје.
Трансплантацијата на срце е извршена кај 66-годишен пациент за кој немало друга алтернатива и чие срце работело со помалку од 20 проценти, а трансплантациите на бубрези се извршени кај двајца 40-годишни пациенти кои оделе на дијализа.
Донор е 42-годишна жена која имала желба да ги донираат органите по смртта.
– Голема благодарност до семејството на починатата пациентка која за жал имаше спонтано крварење во мозокот и беше детектирана мозочна смрт, а сопругот и братот ја испочитуваа нејзината желба која ја искажала уште за време на животот, а тоа е при нејзина евентуална смрт да бидат донирани нејзините органи, изјави попладнево министерот за здравство Венко Филипче.
Пациентот на кого му е вградено новото срце е на респираторна машина, а веќе од утре треба да започне процесот на будење. Оваа фаза, како што посочи Филипче, е критична, но се надева дека пациентот ќе ја надмине и нема да има позначајни компликации.
Директорот на Клиниката за кардиохирургија Сашко Јовев изјави дека операцијата поминала добро и дека пациентот засега е добар.
– Се надеваме дека така ќе остане и понатаму, рече Јовев.
Изразувајќи благодарност до лекарските тимови, Филипче посочи дека ваквите постапки во делот на трансплантацијата го ставаат нашиот здравствен систем на еднакво рамниште со развиените европски земји.
– Мислам дека ваквите успешни трансплантации многу значат. Се подига свеста кај граѓаните за важоста од органодарителството. И овие чинови на трансплантација практично значат дека еден живот денес е спасен, а на други двајца пациенти животот целосно ќе им биде сменет и не ќе мора повеќе да одат на дијализа, рече Филипче.
За националниот координатор за трансплантација Маја Мојсова Мијовска, нема поблагороден чин од органодарителството.
– Со самите дела што ги правиме и кампањата што ја започнуваме во однос на подигнување на свеста на органодарителството видиме дека фамилиите разбираат за што зборуваме и знаат дека доколку се работи за мозочна смрт, останува дел од нивниот близок кој ќе работи во друго тело, изјави Мојсова-Мијовска.
