Александар Вучковски - сомелиер: Како македонските вина го освојуваат светот? ↓↓↓
Низ болниците ширум државава се хоспитализирани над 800 пациенти со Ковид 19. Првично предвидените болнички кревети во јавните и приватните здравствени установи се целосно исполнети. Поради ова нови оддели во болниците и клиниките стануваат Ковид Центри.
Се пополнува и Институтот за ТБЦ, а на интерните клиники обезбедени се дополнителни 150 места. Поради потребата од здравствен кадар министерството за здравство во допис до медицинскиот факултет бара да се мобилизираат сите специјализанти и државни и приватни без разлика која година и да се вклучат во лекувањето на заразените со коронавирус.
На ваквата наредба реагираат од Здружението на лекари специјализанти кои сами си го плаќаат доусовршувањето. Тие велат дека и за нив е предизвик во екот на најголемата пандемија да им помогнат на колегите, но револтирани се дека многумина од 250 доктори кои сами си ја плаќаат специјализацијата немале здравствено осигурување.
-Најголем дел од приватните специјализанти НЕМААТ ЗДРАВСТВЕНО ОСИГУРУВАЊЕ и ДЕЖУРСТВАТА НЕ ИМ СЕ ПЛАТЕНИ. Веќе имаме случаи на приватни специјализанти кои заболеле од Ковид-19 на своето работно место, па прегледите во јавното здравство морале да ги платат сами и одбивале хоспитализација поради тоа што не можеле да си ја дозволат, изјави за Сител д-р Александра Георгиева, претседател на ЗЛС.
Во меѓувреме иако министерот за здравство најави дека 56 интернисти од ПЗУ ќе се вклучат во справувањето со ковид кризата во државните болници, само 9 од нив доброволно се пријавиле да помогнат во лекувањето на пациентите со Ковид.
Од денеска во помош со кадар и опрема се вклучува и АРМ. Претседателот и Врховен командант Стево Пендаровски нареди и медицински лица од Армијата да се ангажираат во работата на здравствени установи. Војската ќе помага и во поставување шатори и друг вид сместувачки капацитети наменети за лекување на заболените лица.
