Диск голф го освојува светот, а го нема во Македонија!? ↓↓↓
Еден од водечките и планетарно најмоќни технолошки гигатни, Гугл, преку официјално соопштение објави дека му ја повлекува лиценцата на Хуавеи за користење на Андроид оперативниот систем за смартфони. Доколку до такво нешто дојде, кинеската компанија ќе мора да ја користи софтверската верзија на системот со отворен код, пренесува Дојче Веле.
Новите смартфони на Хуавеи веќе нема да имаат пристап до услуги како што се Gmail, Google Maps и YouTube, ниту пак до безбедносните „апдејти“.
Сепак, луѓето кои веќе поседуваат Хуавеи телефони ќе можат да ги користат и ажурираат апликациите кои веќе ги презеле.
Минатата недела американскиот претседател Доналд Трамп потпиша одлука со која на американските компании им се забранува да ја користат телекомуникациската опрема која ја направиле „странски противници“, односно фирми за кои се смета дека претставуваат ризик за американската национална безбедност. Со тоа Трамп практично ја стави на црна листа кинеската компанија Хуавеи, ускратувајќи ѝ го пристапот до американскиот пазар и истовремено ограничувајќи ги можностите за продажба на американски компании.
Компанијата Хуавеи се најде под огромен притисок на САД откако се појавија информации дека им дозволува на кинеските разузнавачки служби да користат т.н. „бекдорс“ во софтверот. На таквите обвинувања итно стигна одговор од кинеското министерство за надворешни работи со осуда на „западната хистерија“ околу Хуавеи.
Основачот и генерален директор на фирмата Рен Ченфеи не попушта под американскиот притисок. Тој минатата недела изјави дека неговата компанија „веќе е подготвена на вакво нешто“.
„Не сме направиле никакво прекршување на законот“, рече Рен за јапонскиот венсик „Никеи“. „Очекуваме дека порастот на Хуавеи би можел да забави, но само незначително.“
Според извештаите на американските медиуми, Хуавеи веќе има развиено сопствен оперативен систем којшто ќе почне да се користи во случај да се загуби пристапот до услугите на Гугл и Мајкрософт.
