Со одлука на Aпелациониот суд, затворската казна на бившата министерка за внатрешни работи Гордана Јанкуловска во рамки на случајот „Тенк“ поврзан со набавката на луксузниот Мерцедес во МВР се намалува на 4 години, две помалку од 6-годишната затворска казна која првично беше изречена од Кривичниот суд.
Одлуката Апелација ја објави на својата веб страна:
Апелациониот суд Скопје известува дека, постапувајќи по кривичниот предмет КОКЖ-46/18, во јавноста познат како „Тенк“ , по одржана јавна седница, донесе пресуда со која жалбите на обвинетата Г. Ј. од С., делумно ги уважи на начин што ја преиначи првостепената пресуда во делот на одлуката за казната и обвинетата ја осуди на казна затвор во траење од 4 (четири) години.
Во случајот „Тенк“ освен Јанкулоска осуден е и пораншниот премиер, Никола Груевски, на две години затвор и помошникот министер за внатрешни работи, Ѓоко Поповски, на 4 години и 6 месеци.
