Уствари викендов е затишје пред бура! ↓↓↓
За денеска е закажан почетокот на судскиот процес за насилствата во општина Центар во кој првообвинет е поранешниот премиер и актуелен претседател на ВМРО-ДПМНЕ Никола Груевски. Во друга судница во истот суд, Основен суд Скопје 1, треба да се појави и актуелниот премиер и прв човек на СДСМ Зоран Заев за случајот „Поткуп”. Почетокот на двете судења досега неколку пати беше одложуван.
Судијката Татјана Михајлова го води случајот за шамарите во скопската општина Центар, а обвинителка е Фатиме Фетаи од Специјалното јавно обвинителство. Таа по неколкутте одложувања на почетокот на судскиот процес минатиот пат побара и стражарно приведување на обвинетите.
Апелацискиот суд во Скопје и за овој случај дозволи прислушуваните разговори да се користат како докази. Од објавените прислушувани разговои се слуша како Груевски нарачува насилства и кршење на општина Центар и шамари за тогашниот градоначалник Андреј Жерновски.
Во случајот „Поткуп“ Заев е обвинет за барање поткуп. За овој предмет сѐ уште не е донесена одлука на повисоките судови за тоа дали снимките од посебните истражни мерки ќе важат како докази. Судијка во овој предмет е Дијана Груевска – Илиевска. Обвинетиот Заев вели дека се работи за монтирана и нецелосна снимка и бара да се објави целата снимка. Од објавената видео снимка од посебните истражни мерки на МВР се гледа како тогашниот градоначалник на Струмица Зоран Заев бара поткуп од бизнисмен за изградба на црква.
